Народная культура – найважнейшая частка нашай гістарычна-культурнай спадчыны. За многія стагоддзі свайго існавання беларускі народ стварыў багатую і самабытную культуру, якая была ўвасоблена ў замках, абарончых і культавых збудаваннях, народным жыллі і бытавых рэчах, рыцарскай амуніцыі і ўзбраенні, нацыянальным адзенні, узорных тканінах, разнастайных прамысловых вырабах, духоўных традыцыях, звычаях, абрадах і інш. Гістарычны вопыт паказвае, што традыцыйная народная і прафесійная культуры суіснуюць разам у творчых стасунках і ўзаемадачыненнях. Няўмольны час і ваенныя ліхалецці мянялі культурны ландшафт нашай краіны, не пашкадавалі шматлікіх помнікаў нацыянальнай культуры, шэдэўраў самабытнай народнай творчасці.
Кожны чалавек выбірае для сябе той шлях, тыя арыенціры і каштоўнасці, якіх будзе прытрымлівацца ўсё жыццё. Імі могуць быць устойлівыя маральныя прынцыпы, традыцыі, што склаліся ў народзе. Любоў да Радзімы, да свайго народа, роднага краю, культуры, мовы з’яўляецца трывалай каштоўнасцю для любой нацыі.
З мэтай прапаганды і папулярызацыі гісторыка-культурнай і прыроднай спадчыны нашай краіны ў 1995 годзе быў створаны музейны пакой (Загад № 3/02- ад 09.01.1995г), які складаецца сёння з двух музейных памяшканняў, адно з якіх размешчана на першым паверсе будынка ліцэя ў ізаляванай рэкрэацыі. Другое музейнае памяшканне размешчана на другім паверсе ліцэйскага інтэрната. Налічваецца 664 экспанаты асноўнага фонду і 114 – дапаможнага.
У музейных памяшканнях працуе аб’яднанне па інтарэсам “Ліцэйская скарбонка”. Адным з галоўных і самым любімым напрамкам дзейнасці ўдзельнікаў аб’яднання з’яўляюцца экскурсіі. Навучэнцы знаёмяць наведвальнікаў з двумя галоўнымі экспазіцыямі: “Гісторыя ліцэя” і “Беларускі этнас”. Навучэнцы-экскурсаводы вывучаюць экспанаты музея, адшукваюць інфармацыю аб іх, пішуць тэксты экскурсій, праводзяць экскурсіі для навучэнцаў ліцэя. Яны таксама папаўняюць музей экспанатамі, даглядаюць рэчы.
Пры знаёмстве з першай экспазіцыяй музея "Гісторыя ліцэя” можна даведацца пра гісторыю ўзнікнення ліцэя і прасачыть этапы яго станаўлення, набыць звесткі пра знакамітых выпускнікоў і выкладчыкаў.
Смілавіцкі сельскагаспадарчы прафесійны ліцэй – адзін са старэйшых ліцэяў нашай Рэспублікі. Наш ліцэй вядомы далёка за межамі Беларусі. Сюды наведваліся прадстаўнікі Англіі, Афганістана, Германіі, В'етнама, Іспаніі, Румыніі, Францыі, Кітая, Польшчы і амаль усіх краін СНД. За гады існавання ліцэя падрыхтавана звыш пяцідзесяці тысяч кваліфікаваных спецыялістаў для розных галін прамысловай і сельскагаспадарчай вытворчасці. Ліцэй ператварыўся ў буйны цэнтр навучання і выхавання моладзі.
Асноўныя раздзелы экспазіцыі “Гісторыя ліцэя” наступныя:
1. Заснаванне ліцэя.
2. Ветэраны Вялікай Айчыннай вайны.
3. Выхаванец ліцэя Герой Савецкага Саюза Гінтаўт Вітольд Міхайлавіч.
4. Станаўленне ліцэя пасля вайны.
5. Станаўленне творчага калектыву ліцэя ў 50-60-я гады.
6. Росквіт ліцэя ў 70-80-я гады.
7. Міжнародныя сувязі ліцэя.
8. Выпускнікі ліцэя ў жыцці.
9. Майстры і выкладчыкі ў розныя гады.
Экспазіцыя "Беларускі этнас” расказвае пра побыт беларусаў, асаблівасці вядзення гаспадаркі, прадстаўляе прадметы розных рамёстваў. Гэтыя экспанаты даюць уяўленне пра тое, як жылі, працавалі нашы продкі. На сённяшні дзень налічваецца больш за сто экспанатаў асноўнага фонду. Ёсць ганчарныя вырабы, самаробны посуд, саматканыя посцілкі, настольнікі, прылады працы, сялянскія рэчы, ступа, дзіцячая люлька. Усе экспанаты музея знаходзяцца ў станоўчым выглядзе, вядзецца пастаянны догляд за імі.
|